Пензионерите како амбасадори на македонската култура на меѓународниот фестивал на 3. животно доба во Љубљана

Пета година по ред,  едно здружение на пензионери - членка на Сојузот на здруженија на пензионери на Македонија, ќе учествува на Меѓународниот фестивал на 3. животно доба во Љубљана, Словенија.

Досега учествуваа здружението на пензионери од Куманово, Пробиштип, Кочани и Тетово, а годинава наш амбасадор на културата ќе биде здружението на пензионери од Прилеп.

Вообичаено е на Меѓународниот фестивал да настапи здружение кое се докажало со свои интересни и квалитетни фолклорни настапи на Ревиите на песни, музика и игри, на настапи во земјата, но и надвор од неа.

Така и годинава пензионерите од Македонија ќе прикажат стари македонски песни и ора, интересни инструменти и разнобојни носии од крајот од кој доаѓаат. И годинава со нив ќе пеат и ќе играат жителите на Љубљана кои ќе дојдат да присуствуваат на фестивалот, но и многу други гости и учесници  од повеќе европски земји. Сите тие ќе имаат можност да ја видат и почувствуваат нашата енергија, нашата радост и нашиот почит кон нашето фолклорно богатство, традиција и идентитет.
Ќе видат како се сака и чува она што со векови се напластило во нашето славно минато. Ќе видат дека корените на сите кои живеат во Македонија се длабоки и со вековна историја. Преку писокот на зурлите, ударите на тапаните, преку песната и ората на пензионерите, уште еднаш ќе види и дознае Европа која е Македонија.

Калина С. Андонова